उपोषणाचा दूसरा दिवस

जामखेडमधील अवैध कलाकेंद्रांवर कारवाईची मागणी

दबावाखाली प्रशासन दखल घेत नसल्याचा आरोप
जामखेड प्रतिनिधी

तीन वर्षापासून वारंवार मागणी करूनही प्रशासन दखल घेत नाही .त्यामुळे आता उपोषण आणि १५ जून रोजी आत्मदहन करण्याचा इशारा देत सचिन आजबे यांनी सूरू केलेल्या उपोषणाचा दूसरा दिवस आहे. .जामखेड तालुक्यातील मोहा हद्दीतील तसेच शहर परिसरातील अवैध कलाकेंद्रांवर तातडीने कारवाई करण्यात यावी, या मागणीसाठी सामाजिक कार्यकर्ते तथा अखिल भारतीय कुणबी
मराठा महासंघाचे युवा जिल्हाध्यक्ष सचिन दत्तात्रय आजबे हे जामखेड तहसील कार्यालयासमोर सोमवार दि ८ जुन पासून आमरण उपोषणास बसले आहेत. आज दूसरा दिवस आहे .दबावाखाली प्रशासन दखल घेत नसल्याचा आरोप सचिन आजबे यांनी केला आहे .

याबाबत तहसीलदार, जिल्हाधिकारी, जिल्हा पोलीस अधीक्षक तसेच संबंधित प्रशासनाकडे स्मरणपत्र सादर करण्यात आले आहे. त्यांनी दिलेल्या स्मरणपत्रात म्हंटले आहे की गेल्या तीन वर्षांपासून जामखेड परीसरातील अवैध कलाकेंद्रांबाबत विविध स्तरांवर तक्रारी व अर्ज करूनही कोणतीही ठोस कारवाई झालेली नसल्याचा आरोप आजबे यांनी केला आहे.

स्मरणपत्रात नमूद केल्यानुसार, मोहा हद्दीतील संबंधित कलाकेंद्र निवासी व वाणिज्य परवाना न घेता सुरू असून शेतीच्या जागेचा बेकायदेशीर वापर केला जात आहे. तसेच राज्य महामार्गाच्या नियमांचे उल्लंघन करून रस्त्यालगत अतिक्रमण करण्यात आल्याचा आरोप करण्यात आला आहे. संबंधित ठिकाणी वेश्या व्यवसाय, मद्यप्राशन व मद्यविक्रीसह विविध बेकायदेशीर प्रकार सुरू असून त्यामुळे जामखेड शहर व परिसरातील गावांच्या सामाजिक प्रतिष्ठेला धक्का पोहोचत असल्याचे स्मरणपत्रात म्हटले आहे.

यापूर्वी ७ मे २०२६ रोजी सादर केलेल्या अर्जाची कोणतीही दखल घेण्यात आलेली नसल्याचे नमूद करत, प्रशासनाने तातडीने योग्य ती कारवाई करून संबंधित कलाकेंद्रांचे परवाने कायमस्वरूपी रद्द करावेत, या मागणीसाठी सामाजिक कार्यकर्ते सचिन आजबे हे ८ जून २०२६ पासून जामखेड तहसील कार्यालयासमोर आमरण उपोषणास बसले आहेत.

दरम्यान, या प्रकरणात स्वतःच्या किंवा कुटुंबाच्या जीवितास कोणतीही हानी झाल्यास त्यास संबंधित कलाकेंद्र मालक व प्रशासन जबाबदार राहील, असेही त्यांनी स्मरणपत्रात नमूद केले आहे. आता प्रशासन या उपोषणाची कशा पद्धतीने दखल घेणार याकडे लक्ष लागले आहे .