एसआयआरला राज्यात १० दिवसांची मुदतवाढ

बीएलओद्वारे घरोघर भेटी ८ ऑगस्टपर्यंत

जामखेड प्रतिनिधी

मतदार यादी अधिक अचूक आणि अद्ययावत करण्यासाठी सुरू असलेल्या विशेष सखोल पुनरिक्षण (एसआयआर) अभियानाला महाराष्ट्रात १० दिवसांची मुदतवाढ मिळण्याची शक्यता आहे. निवडणूक आयोगाने SIR प्रक्रियेचे वेळापत्रक सुधारित केले असून, मतदारांना नोंदणी, दुरुस्ती आणि हरकती नोंदवण्यासाठी अतिरिक्त वेळ उपलब्ध करून देण्यात आला आहे.

निवडणूक आयोगाच्या निर्देशानुसार SIR अंतर्गत मतदारांच्या घराघरात जाऊन पडताळणी केली जात आहे. या प्रक्रियेद्वारे मतदार यादीतील दुबार नावे, स्थलांतरित मतदार, मृत व्यक्तींची नावे यांची तपासणी करून पात्र मतदारांची नोंद कायम ठेवण्याचा उद्देश आहे. महाराष्ट्रात सुरू असलेल्या या अभियानासाठी मोठ्या प्रमाणावर बूथ लेव्हल ऑफिसर्स (BLO) यांची नियुक्ती करण्यात आली आहे. नागरिकांना मतदार यादीतील नाव, पत्ता किंवा इतर तपशीलांमध्ये बदल करायचा असल्यास या कालावधीत अर्ज करता येणार आहे.
या मुदतवाढीमुळे मतदारांना आवश्यक कागदपत्रांसह आपली माहिती तपासण्याची आणि त्रुटी दुरुस्त करण्याची संधी मिळणार आहे. निवडणूक आयोगाने सर्व संबंधित अधिकारी आणि राजकीय पक्षांना सुधारित वेळापत्रकाची माहिती देण्याचे निर्देश दिले आहेत. दरम्यान, नागरिकांनी SIR प्रक्रियेत सहभागी होऊन आपले नाव मतदार यादीत कायम असल्याची खात्री करून घ्यावी, असे आवाहन करण्यात येत आहे.

—————————

एसआयआर अभियानाचे सुधारित वेळापत्रक !
————
बीएलओ मार्फत घराघरात भेटी: ३० जून ते ८ ऑगस्ट २०२६

मतदार केंद्रांचे पुनर्रचना /व्यवस्थापन: ८ ऑगस्ट २०२६

प्रारूप मतदार यादी प्रसिद्ध १७ ऑगस्ट २०२६

दावे आणि हरकती १७ ऑगस्ट ते १६ सप्टेंबर २०२६

अंतिम मतदार यादी प्रसिद्ध १९ ऑक्टोबर २०२६

केंद्रीय निवडणूक आयोगाने दिनांक १५ जुलै २०२६ रोजी सदरील सुधारित वेळापत्रक जाहीर केले असून त्यामध्ये दिल्लीचा उल्लेख आहे. हेच वेळापत्रक महाराष्ट्रासाठी लागू होवू शकते.

प्रतिनिधी यासीन शेख 9423391215